Donn et Houpmenü opmaache
Hee di Sigg_is_op Kölsch
(mieh kölsche Sigge)
unn jeshrivve wii_mer_t_shprish
(mieh Sigge jeshrivve wii_mer_t_shprish)

Jean Jenniches es ene Neppeser jewääs. Hä wood aam 6. Fäbroa em Johr 1894 en Neppes jeboore un es doh och jestorve, aam 25. Määz em Johr 1979. Hä es doh zor Scholl jejange, hät doh Enshtallatör jeliehrt, der Meister jemaat, un bes zor Rent singe eije Bedrief aam Wellemplaz jehatt.

Zweschedren, am 26. Apprell em Johr 1922, hät hä „si Fränzje“ jehiirodt, et Franziska Steingaß, en Tant vum Toni Steingaß. Die zwei hatte sesch ärsch jähn, han ävver kein Kinder krääje. Em Johr 1972 han se noch Jolde Huhzick zesamme jefiehrt, un em Johr 1974 es it jeschtorve, fönnef Johr vüür imm.

Övver Johrzeehnte wohr hä janz eng mem Eifelverein sing Ootsjropp vun Kölle.

Zick der 1930-er Johre hät hä jeschrevve. So joot wi nuur op Platt. Vun imm jidd_et Verzällscher, Rühmscher, Bütterädde, Hüerschpellscher, Poppeschpellscher un Einakter för de Bühn. De miehste Saache jon övver janz nomaale Lück en Kölle, wi se jelääf han un sesch jezängk han un wider verdraare han, sich henge eröm dorsch de Zäng jetrocke un vüre eröm fründlesch der Hoot jetrocke. Ävver och vun dä Äleebneße uß singe Kindheit hät hä jeschrevve. Ald em Johr 1939 hät hä met däm Stöck „Gräfin Wooschtemann“ et Publikum vom Hänneschen beeindruck un sesch ene Name jemaat. Hä hät dann för et Hänneßje, för de Poppesetzung, för dä Sender Kölle un spääder der WDR, för de Kumede, un andere jeschrevve. Dat Schriive hät hä si Levve lang nit mieh opjehoot, un singe Lässer un Zohüürer vill Spaß und Freud domet jemaat.

Em Johr 1964 hät dä Heimatverein Alt-Köln e Bööschelsche vun em erus jebraat. Et wohr de Nummer 41 en dä Bööscher-Reih vum Verein un hatt dä Tittel: „Der Familjeusflog“. Met singem Verzäll „Et Golde Dömsche“ hät hä em Johr 1972 beij_em Wettbewerb vum Heimatverein Alt-Kölle ene Priiß kräje. Em Johr 2009 hät dä Heimatverein Alt-Kölle noch e Booch vun emm eruß jejovve, dißmool unger dämm Tittel „Foder för Laachduve“, dä hä sesch ald vör sing eetz Booch jewönsch hatt. Et hät de Nommer 65. Et hät e paa mieh Rüümscher un Verzällscher dren, un die uß däm eetste Booch. Sing länger Schtöcke un Poopeschpellscher sin bes hück nit jedrock ze han.

BööscherÄndere

  • Jean Jenniches: „Der Familjeusflog“, met Belder vum Paul Karge, Beiträge zur kölnischen Geschichte, Sprache, Eigenart Band 41, 79 Sigge, Greven Verlag, Kölle, 2009. ISBN 978-3-7743-0435-2
  • Jean Jenniches: „Foder för Laachduve“, Beiträge zur kölnischen Geschichte, Sprache, Eigenart Band 65, 176 Sigge, Greven Verlag, Kölle, 2009. ISBN 978-3-7743-0435-2

WebsiggeÄndere