Eurode

Eurode essene Aat Stadt, symbolėsch zesammejesaz uß

• Hächzoreroth en Deutschland_em Kriiß Ooche en Döütschlannd_un
• Kirchroa en de Nederläng_en Söd_Limborresh en Hollanndt.

Dad_eß de eezte Europa-Shtadt.

Kirchroa heis_op deutsch Kirchrath, op neederlängsch Kerkrade, unn_op limmbůrjėsch te Kèrkrao. Dat hüüort on_noch bëijm Zwëkfobandt Parkstad Limburg do_bëij, un litt en_de Euregio Maas-Rhein.

Hächzoreroth heis_op neederlängsch 's-Hertogenrade un op deutsch Herzogenrath, op limmbůrjėsch Hertserao. Et hüüot bëij de StädteRegion Aachen, en do Lanndschaffßfobanndt Rhinglandt], un lėdd_en_de Euregio Maas-Rhein.

Zig dämm zwöllefte Johongot wooche di zwëij ëijn Shtadt, bess_em Joohr 1815 de Jränz zwesche se jelaat wood. Dä Quatsch woo dä Ääntß vum Wiener Kongjrëß vun 1815. Do hann_se dem Napoleon sing franzüüsėsh Deppachtemeng fun Beneden-Maas oppjelööß, unn_et zwesche de Künninge fun de Nederläng un Pröüße oppjedëijldt. Do_bëij koohm de Burrsh Rode mem Hächzoch noh Döütschlandt_ße lijje, de Afdëij Rolduc med_de Kerresh en de Nederläng. Do fun kumme wall och de naame her, di di Dëijle dann krääte. Ävver op bëijde Sigge fun de neuje Jränß schwaadt mer de sellve Shprooch, en rėpůarėsch, do wunne de_sëlleve Famillije, fiert mer do Faßteleer op de sellve, ëijen Aat — med: „Roda Alaaf!“

Roda oddo Rode eß Dëijl vun däm Name, schliißlėsch nannt_mer di jannze Jääjndt övver Joohonndotte: „et Land van Rode“ of: „et Land van 's Hertogen Rode“ onger em „Land van Euvermaas“. Winnishßtenß av_em Joohr 1104 bėkannd_eß de Burrsh Rode], hügg_en Hächzoreroth; un och dä „Schötz fun Rode“ eß alls_enne Hëld_beß hück en de Köpp, un lebëndėsh jeblevve.

Europa es dä anndere Nomens_Dëijl, kloo, wëijl_me_de hoffnong hätt, datt dat Jedrißße med_dä Jränß med Europa enß bahl förbëij sinn weed.

Doll eß, di hann do en Shtrooß, di hëijs_och ußjeräshned_de „Nöü_Shtroohß“, op deutsch Neustraße, op neederlängsch de Nieuwstraat, do löüf de Jränß jenou_en_de_medde_fun. De ëijn Sigk eß en Lėmmbůrresh, de anndo en Döütschlanndt. Wėijl_de Schėlldo en Hollandt bellijo senn, han se de Schelldo fun do jeholldt, un och de Buß_Hüüsje sen holländėsch, noh_dämm do de Bußße fun de ASEAG faare. öm 2000 eröm, wood_et Eurode-Business-Center jeboud, eh Huuß, wadd_am_Ëng_fun_dä Shtroohß jäds_och jenou övver de Jränß shtëijdt. De Pollizëij es do och dren enjetrokke.

Dä zosammeschloß jidd_et zigg_em Joohr 1991, woh dä Fodraach fun Anholt dä obb_en öffentlėsh_rääshlėshe Basis mööshlesh jemaat hätt. M'r ärrbëijdt zosamme obb_en ökkonoomėsche Aat en de Weetschavv_un en de kultuur un en sozjaale saache. Zigg_em Joohr 1998 jidd_et on_noch dä Openbaar Lichaam Eurode enne Rood uß bėijde Jemäijnde wo sesh de bėijde Börrjo_Meeijstore em Fürsez afwääßßelle důnn.

Hoffe mer_enz, dat dat Bëijspell fun Eurode wörreklesh hellef, dat de Jränß widdo uß de Köpp un de Häzze fun de Lück foschwėndt.

Websigge

• Websigge vin Eurode (neederlängsch, deutsch, englisch)