Dat ahle Kriel op dr Schweidkaat, 17. Jh.

Ahl Zigge Ändere

Wen mer zorück jonn in et Joohr 1223, do wor Kriel nur ene Hoff, dä mit singe Ländereie dr Kirresch Zint Gereon in Kölle jehot hätt. Mit dr Zick wore et e paar Hüsje mih, un et wor e Dörp, zo demm och et nevvenaan jeläjene Deckstein zälle dät. De mießte Lück wore domols Buure un kannte von fröh bis spät nur Plackerei, Sonndags jinge se bedde in ener Holzkiresch, do wo Hück et „Krieler Döömsche“ druss jewoden eß.

Buurehöff, Mülle un Jereech Ändere

Dröm heröm in Lind dat wor e Veedel wat et Hück nit mih jitt, jov et mit dr Zick noch en Hääd mih Hüser un Höff, dr „Platzhoff, dr „Kitschburjer Hoff“, dr „Kleinjohanneshoff“, dr „Mönchshoff“ un dr „Decksteiner Hoff“ (eetzte Urkund im Joohr 1316). Dat Ritterjut „Hohenlind“, et „Tönnishüsje un e paar Mülle, nöhmlisch de „Decksteiner Müll“ un de „Pletschmüll“. En Müll wor nit eije, dat wor vum Müller jepaach, se hatten ene sujenannte „Zehnte“ an die do Bovve ze jevve (jenau wie Hück). Kän vum janze Kireschspill wor dr Hoff Kriel, nit zoletz dorüm jov et do för all Zänkereie et Jereech. Dat han se ävver im 15. Joohunndot noh Zint Gereon in Kölle verlaat.

Esu jing et üvver Johrhonderte wigger, de Lückscher hatte nit vill ze laache. Profiteere däten nur die fing Heere, us demm Jrund wot dat Janze och „Herrlichkeit Kriel“ jenannt.

Franzuusezick Ändere

Im Joohr 1802 wor et dann met dr Herrlichkeit passė, de Franzuuse wore jekumme, fing Lück kunnte jetz op französisch parliere, hatte ävver nix mih em Jeldbüggel. All dat, wat die Kiresch anjehäuf hat an Ländereie, mot se avjävve. Üvverhaup wot vill ömjemodelt, Krieler jinge för ze hierode op et Standesamp noh denne Buure in Effere, wat hückzedaachs en Deil vun Hürth es. Zo Kölle jehot hät Kriel av em Joohr 1888.

Hück Ändere

Hückzedaachs es Kriel e Veedel em Söödweste vun Kölle, dä Bezirk vun Kölle heijß Lindedahl, wo dat Veedel enne Deil vun es.