Akademie för uns kölsche Sproch

Bei der Akademie för uns kölsche Sproch ka' mer Kölsch liere. Lügg, die sich doför intresseere, künne kölsche Originale, Stadtgeschichte, Literaturkunde, Grammatik un Brauchtum studeere. Am Engk vum Semester gitt et dann Note:

  • metgemaht
  • ööntlich bestande
  • god bestande
  • ärg god bestande

De Akademie hät usserdäm en Standard-Orthographie för et Kölsche vörgeschlage, die miestens op die Schrievgewennde vun dä ahle kölsche Deechter wie Willi Ostermann angelehnt es, ävver och jet moderniseet es; för e Beispill schleiht die Akademie nit vör, Wööder wie es, Gass usw. met ß ze schrieve, wie der Ostermann dät. En Kuntrass met de ander geläufige Schrievwiese för et Kölsche schriev mer dä ahle G-Laut, dä zo andere Laute gewoode es, immer "G", wenn mer si Kölsch an de Regele vun der Akademie anpass: god nit jod, Dag nit Daach. Üvver aachzehndausend Endräg gitt et em Mundartwööterboch vun der Akademie. All die kölsche Wööt, die mer hüggzedags gebruch, sin dodren orthographisch opgeschrevve. Die Sprochwesseschaffler han sugar de internationale Lautschreff (IPA) met erengebraht.

De Kootgrammatik vun der Akademie, die De kölsche Sproch heiß, liehrt einem, wat richtig es un wat verkeht es em Kölsche, och wenn de Kölsche vun hügg immer mieh tendeere, dat Verkehte ze maache, weil et em Deutsche esu es. För e Beispill ka' mer do liere, dat mer "ich wöödt gän e Kölsch drinke" nit sage kann; et muss "ich dät gän e Kölsch drinke" heiße. Noch e Beispill us der Grammatik es, mer kann "Ich saht dat zom Pitter" nit sage, denn et heiß "Ich saht dat för der Pitter".

BöcherÄndere

  • Christa Bhatt und Alice Herrwegen: „Das Kölsche Wörterbuch. Kölsche Wörter von A-Z“. Herausgegeben von der Akademie för uns kölsche Sproch, Köln, 2005. ISBN 3-7616-1942-1
  • Alice Tiling-Herrwegen: „De kölsche Sproch. Kurzgrammatik Kölsch - Deutsch“. Herausgegeben von der Akademie för uns kölsche Sproch, Köln, 2002. ISBN 3-7616-1604-X
  • Christa Bhatt: „Kölsche Schreibregeln. Vorschläge für eine Rechtschreibung des Kölschen“. Herausgegeben von der Akademie för uns kölsche Sproch. Köln, 2002. ISBN 3-7616-1605-8

Kick och ens heeÄndere

Dat Mundartwörterboch vun de Akademie es e orthographisch Wörterboch. Däm Wrede singe Sprachschatz es ald jet älder un es mih en semantische Sammlung vun Usdröck.

WebsiggeÄndere