Ööcher Dom (Rus)

Die Sigg hee es op Kölsch
(mieh kölsche Sigge)
un geschrevve en de Schrievwies vun de Kölsch-Akademie
(mieh Sigge en de Schrievwies vun de Kölsch-Akademie)

De ‘Ööcher Dom’ (deutsch ‘Aachener Dom’) ess ene Zoot vun Kulturrus, ene lachsrusa Teehybride, die 1981 in Frankreich vun Marie-Louise Meilland unger dem änglische Name ‘Pink Panther’ engeführt woode es. Andere Name sin op Franzüsisch ‘MEIcapinal’ un ‘Panthère Rose’. De Rus es ene Krützung zwesche de pinke ‘Coppelia'76’ (‘MEIgurami’) und de aprikusfärvene ‘Romantica '76’ (‘MEInaregi’), och vun de Frau Meilland.

Rus ‘Ööcher Dom’

De ‘Ööcher Dom’ vür de Annakapell vum Ööcher Dom

De ‘Ööcher Dom’ deit böschig huh wahße un hät dobei esu ville Zwigge, dat se ene kompake Struch vun 60 bes 90 Zentimeter Hüh un bes zo 40 Zentimeter Breide weed. De Planz hätt meddelgroße bes große grööne Blädder. Se ess winterhadd un de meiste Rusekrankheite künne ihr nix aanhan.

Ihr geföllte Blöte stunn allein, metzigge och en Böschel, han 26 bes 40 gebogene Blöteblädder un sin 10 bis 12 Zentimeter grooß. De Blöte sin koot vör dem Verblöhe fass wie Pingsruse us.. En wärmere Gägende sin die Blöte komplett en deselbe Färv, ävver wenn et schudderiger es han se ene Kontrass zwesche hellere und dunkelere Stelle met enem rusarude Rand.

De ‘Ööcher Dom’ blöht usduurend vun Juuni bes en de Hervs un deit remontiere. Dat heiß, dat se noh dem eezte Flor noch ene zweite hätt. De Blöte han zemlich lang ene fruchtige Döff, ävver künne fimschig op Rähn reagiere.

De Planz ess besonders für Blomrabatte, Buuregääde un Hegge zo gebruche. Se weet ävver och als Schneddblom vür Blomeschmuck genötz un in de Blomeläde aangebodde. De ‘Ööcher Dom’ weed in ville Rusegääde in de ganze Welt gezeigt. Öm se aanzeluge muss mer ävver nit in de ganze Welt herumreise. Em Gaade aan de Südsigg vum Ööcher Dom is se och zo sinn, vür de Annakapell.

Dä Name hätt de Rus ‘Ööcher Dom’ vom Ööcher Dom. Dat es ene wechtige karolingische Kirch en Ooche un ihre Grundstein woodt mol evvens 450 Johr fröher als dä vum Dom en Kölle gelaat (un de Ööcher Bauarbeider woore övver dausend Johr fröher fäädig). Noh de Zoot ‘Groß an Ooche’ (deutsch ‘Gruß an Aachen’) es de ‘Ööcher Dom’ de zweite Rus die vum Name her met Ooche ze dunn hätt. De andere Zootename, ‘Pink Panther’ oder ‘Panthère Rose’, kumme vun däm löstige Kriminalfilm De rusarude Panther us dem Johr 1963.

Jet zo lese

Böcher

• Peter Beales u. a.: Rosen Enzyklopädie, Könemann, Köln 1999, ISBN 3-8290-1954-8, S. 472 (deutsch)
• Marie-Thérèse Haudebourg: Roses du Jardin, 2009, ISBN 978-2-01-237471-3, S. 129 (franzüsisch)
• Thomas Caims: Modern Roses 10, American Rose Society (Hrsg.), 1993, ISBN 0-9636340-0-3, S. 453 (änglisch)

Websigge

 Commons: ‘Ööcher Dom’ (Rus) – Sammlung von Bilder, Filemche un Tön op Wikimedia Commons

• ‘Aachener Dom’ Rose Description (deutsch)