Groß an Ooche
(mieh kölsche Sigge)
un geschrevve en de Schrievwies vun de Kölsch-Akademie
(mieh Sigge en de Schrievwies vun de Kölsch-Akademie)
De ‘Groß an Ooche’ (deutsch ‘Gruß an Aachen’) ess ene Zoot vun Kulturrus, ene eets päälrusa un später rohmwieß gefärvte Floribundarus. Se woodt vun L. Wilhelm Hinner us ene Remontantzrus un ene Teehybrid gezöch un av 1909 vun däm Gääsch un Blomehändler Philipp Geduldig op de Maat gebraat.[1] Andere Name sin 'Salut d'Aix la Chapelle' un 'White Willow Glen'.
Dä 'Groß an Ooche' is ene kleine oprääch in de Hüh wahßende Struch, dä en Meddeleuropa vun 45 bes 90 Zentimeter huh un bes zo 75 Zentimeter breid weed. De Planz es besonders för Blomrabatte un Buuregääde zo gebruche, weed ävver och als Kletterrus gezöch.[2] Ußßerdäm weed se als Schneddblom vür Blomeschmuck genötz. De ‘Groß an Ooche’ weed off en Rusegääde gezeigt. De Planz ess winterhadd un de meiste Rusekrankheite künne ihr nix aanhan.[3]
De anfangs päälrusa bes lachsrusa Blöte han 40 bes 50 Bläddere un stonn in kleine Böschel. De Blöte sin perfek en Schaleform un zo enem Veedel gefüllt. Se doffe wie ene Teerus noh Holunder. Noh einiger Zick sin se fahl, krämwieß bes rohmwieß. De Färv und de Doff hänge vum Wedder un vun de Lufffeuchtigkeit av.[4] De Planz deit remontiere. Dat heiß, dat se noh dem eeschte Flor noch ene zweite hätt.[3]
De ‘Groß an Ooche’ es för de Rusezöchter en de ganze Welt jet ganz besonderes: hä wor de eeschte Floribundarus un es ene Vörgänger vun ville Zoote vun Ruse.[2] Dä Name kütt vun der Stadt Ooche, wo dä Här Geduldig met singer Famillich de Blomelade hatt.[5]
Övver de Johre hädd et mieh un mieh Zoote gegävve, die mer op der ‘Groß an Ooche’ zoröckführe kann. E paar Beispill sin 'Irene Watts' (1929), 'Rosa Groß an Ooche' (1930), 'Minna' (1930), 'Goldene Groß an Ooche' (1935), 'Jean Murour' (1935), 'Climbing Groß an Ooche' (1937), 'Groß an Ooche Superior' (1942) un 'Wieße Groß an Ooche' (1944).
Jet ze lese
ÄndereBöcher
Ändere- François Joyaux: Enzyklopädie der Alten Rosen, Ulmer, ISBN 978-3-8001-5333-6, S. 234 (deutsch)
- Peter Beales u. a.: Rosen Enzyklopädie, Könemann, ISBN 3-8290-1954-8, S. 287 (deutsch)
- Trevor Griffiths: Glorious Old Roses, Penguin Books 2000, ISBN 978-0670894314, S. 205f. (änglisch)
- David Austin: Vom Zauber einer Königin. Franckh-Kosmos Stuttgart 2012, ISBN 3-440-13444-X, S. 110 (deutsch)
Websigge
Ändere
- Gruss an Aachen Rose Description (änglisch)
Woher mer dat wesse
Ändere- ↑ Welt der Rosen: Rosenzüchter: L. Wilhelm Hinner, avgerofe am 7. April 2024
- ↑ 2,0 2,1 David Austin: Vom Zauber einer Königin. Franckh-Kosmos Stuttgart 2012, ISBN 3-440-13444-X, S. 110
- ↑ 3,0 3,1 Beetrose ‘Gruß an Aachen’, avgerofe am 6. April 2024
- ↑ Brent Dickerson: The Old Rose Advisor, Band 2, Lincoln 2001, ISBN 0-595-17299-7, S. 235f (änglisch).
- ↑ Blumen Geduldig, avgerofe am 7. April 2024 (deutsch, unge op dä Sigg)