Wolfgang Overath

Wolfgang Overath (* 29. September 1943 en Sieburch) eß ne ehemolige deutsche Foßballspeller un zick Juni 2004 Präsident vom 1. FC Kölle.

Overath hätt mem Foßballspelle 1953 en singem Heimatverein Siebursch SV 04 aanjefange. 1962 eß'e zom 1. FC Kölle jewääßelt, für dänn e zwesche 1963 un 1977 765 Spell jespellt un 287 Tore jeschosse hätt, davon en d'r Foßball-Bundesliga 409 Spell un 83 Tore. Mem "FC" eß'e 1964 Deutscher Meister un 1968 DFB-Pokal-Siejer jewudde.

Zwesche 1963 un 1974 wutt'e 81 Mol en de Deutsche Foßballnationalmannschaff berofe un hätt 17 Tore jemaat. Overath hätt aan drei Foßball-Weltmeisterschaffte deeljenomme: 1966 en England, 1970 en Mexiko un 1974 bei uns en Deutschland.

Singe jrößte Erfolesch hatt'e 1974 bei de Weltmeisterschaff em eeje Land als se em Endspeel 2:1 jäjen Holland jewonne hann un Foßballweltmeister jewudde sen.