Brings

Brings ess en kölsche Rockband, die 1990 vun Peter un Stephan Brings jejründt woodt. Die miehste Texte vun Brings sind en kölscher Sproch verfass ävver zick 1995 han se och op Deutsch jesunge. En de 90er wohr Brings en Kölschrock-Band die mit der kölsche Fastelovendszen nix ze dunn hatte, änhlich wie BAP em vörherije Johrzehnt. Peter Brings hät vun dä Zigg jesaht: „Jeder direkte Bezug zu Köln wäre tödlich gewesen. Da hätten wir uns gleich zur Prunksitzung mit Prinz Karneval anmelden können.“. Durch de 90er Johre blevv Brings usser der Karnevalsszen, un woodte ziemlich bekannt. Bekannte Leeder vun dä Zigg sin Nur mer zwei, Katharina, Nix is verjesse, Ehrenfeld un Handvoll ze fresse. 2000 hät sich dat all dramatisch verändert, wie dat Party-Leed Superjeilezick zom Karnevalshit vun däm Johr woodt. Superjeilezick han se nit avseechlich als Karnevalsleed jeschrevve, et Leed wohr nor als Jebootsdaachsständche för de Band jedaach. Trotzdäm hatten se ene jroße Hit. Flöck han se sich en en Stimmungsband verwandelt un ehr Leeder sin hügg explizit för Fastelovend jedaach. Nohm Erfolch vun Superjeilezick woodt Rockmusick em alljemeine en akzeptabel Stil för Karnevalsleeder un vill hüggije Karnevals-Bands wie Kasalla, Lupo un Cat Ballou spille Musick met Rock-Enflöss. Em "neue Stil" woodte Leeder wie Su lang mer noch am Lääve sin, Poppe Kaate Danze, Mer trecken op der Mohnd un Su ne Daag, esu schön wie hück unger andere populär. För de Kölner Haie han se e Leed jeschrevve, die hügg noch wie ehr inoffizielle Hymne jilt (Hoch - höher - Haie!).