Wikipedia

1-Billion-Mark-Stöck vun de Provinz Wässfale

Dat 1-Billion-Mark-Stöck vun de Provinz Wässfale es ene Nudmünz, die vun de Landesbank Wässfale usgegevve woode es. De aangegevvene Wäät vun ein Billion Mark is niemols vun ene andere deutsche Münz üvvertroffe woode. Dä Grund för esu ene düüre Münz wor de Deutsche Inflation vun 1914 bes 1923, wie dat Geld von Dag zo Dag un von Stund zo Stund winniger wäät woodt. En de letzte Dage vun de Inflation sin Münze, Geldsching un Breefmarke met richtig huhe Wääte usgegovve woode. Ävver wie de Lück dat Geld in de Häng bekome wor dä Krom ald nix mie wäät. Weil Münze un Papiergeld gar nit esu flöck gemaat wääde kunnte, wie se an Wäät verlore han.[1]

1-Billion-Mark-Stöck, Neuselver verselvert (Durchmesser 60 mm

Dat 1-Billion-Mark-Stöck es dat letzte vun ene ganze Reih vun Nudmünze us de Provinz Wässfale, die vun 1921 bes 1923 us Allu, Tombak, Bronß, Koffer und Neuselver em Wäät von 50 Penning bes 1 Billion Mark gepräg woodte. Vörredrop es e Pääd, dat Wässfaleross, dat noh links am höppe es. Dorunger steiht de Wäät vun de Münz un ringseröm "Notgeld der Provinz Westfalen" (op Kölsch: "Nudgeld vun de Provinz Wässfale"). Op de Rücksigg es miestens ene ahle Mann, dä Freihäär Karl vom und zum Stein, dä grasührig noh links luurt. De Ömschreff es "1757-1831 - Minister vom Stein - Deutschlands Führer in schwerer Zeit" (op Kölsch: "Minister vom Stein. Dä Föhrer vum Deutschland en ene schlimme Zigg"). Der Entworf kom vun däm Beldhauer un Medaljöhr Rudolf Bosselt. Et gitt ävver och e paar Münze met däm Brussbeld vun de Annette von Droste Hülshoff, ene Deechterin us Wässfale, met de Ömschreff "Annette v. Droste-Hülshoff - 1797-1848 - Westfalens Dichterin" (op Kölsch: "de Deechterin vun Wässfahle"). Dä Beldhauer Anton Rüller hät dat Portrait gemaat.[1]

Op dem 1-Billion-Mark-Stöck steiht unger däm Pääd en drei Zeile de Wäät vun de Münz: "1 Billion Mk." Op der Rücksigg es dä Freihäär vum Stein avgebeld. Die Münz es us Neuselver gemaaht, dat es ene Legierung us Koffer, Nickel un Zink. 11.113 Stöck woodte verselvert un nor 500[1] oder 100[2] Stöck wore us Tombak un vergold. Et gov villeich och e paar Stöck us Bronß, ävver die wore nur zum Usprobiere en de Werkstatt. Dä Durchmesser litt bei 60 Millimeter un dat Geweech bei 83 Gramm. Dat es ärg vill för ene Münz.[1]

Dat die Münze esu klobig wore maht ävver nix. Se wore nömlich gar nit för dat Portmanee gedaach. Usgenomme de Nudmünze us dem Johr 1921 för 50 Penning un ein Mark, die wore wirklich Geldersatz.[2]

Am 11. Janewar 1923 han de Franzuse und de Belgier dat Ruhrgebiet met Soldate besetz. De Deutsche wore nämlich zo blank öm all dat zo bezahle, wat se em Eetste Weltkreeg bei denne kapott gemaht han. För an ihr Geld ze kumme wullte die Franzuse un Begier sich dat Ruhrgebiet met alle Arbeitskräff schnappe und die Koll un dat Ieser selvs verbruche oder verkaufe.

Unger de Franzuse wullte die Arbeider em Ruhrpott ävver nit malooche. Also gov et Knies un de mieste Arbeider wore am streike. De Regierung in Berlin un ville Lück in ganz Deutschland wullte dat ongerstütze. Met Spende vun Zeesse, Klamotte un Geld. Domet mieh an Geld zusamme kom han ville Künsler klein Kunswerke wie Posskaate un Medallje gemaat un als Pries för Spender aavgegevve.

De Nudmünze vun Wässfahle wore als esu ene Pries för Lück gedaach, die de Ruhrkampf ongerstötz han. De Münze vum Hervs 1923 sullte wirklich zum Bezahle sin. Ävver als se usgegevve wode kunnt mer gar nix mie für dat bessche Geld kaufe. Drei Wäätstofe gov et en vergolde Tombak oder Koffer, se woodte och Ruhrdukate genannt. Vun eine Münz, för 50 Millione Mark us Allu, han se besonders ville gemaaht, fass ein Million Stöck. Die woodte an Schullkinder verschenk.[2]

Och de Münz för 1 Billion Mark wor nit zum Bezahle. Se woodt eesch 1924 usgegevve, do gov et ald neu Geld. Die Münz us Neuselver han se dann för 2,50 Reichsmark - däm neue Geld - als Andenke un Sammlerstöck verkauf. Un de vergoldte woodte suwiesu vum Landeshaupmann vun de Provinz Wässfale, Franz Dieckmann, mieh privat in Opdrag gegovve. Die woodte zom Deil verschenk.[1][2]

Selde Münze wäde off nohgemaat, öm Sammlere zo betuppe. Vum 1-Billion-Mark-Stöck gitt et Galvanos, dat sin met elektrische Strom em Salzbad gemaate Kopie vun eine Sigg. Kromme Hüngk dunn die Hälfte zosammekläve un de Fälschung als ech aanbeede. Et gitt ävver och Nohbeldunge, die wirklich god gemaat sin. De staatliche Hamburger Münz und de Privatfirma MDM Münzhandelsgesellschft Deutsche Münze han 2001 un 2015 Nohbeldunge gemaat. Op däm Hals vum Freihäär von Stein steiht ävver de Johreszahl, su dat de Lück de Nohbeldung erkenne.[2][3]

Woher mer dat wesse

Ändere
  1. ↑ 1,0 1,1 1,2 1,3 1,4 Kurt Jaeger. Die deutschen Münzen seit 1871 mit Prägezahlen und Bewertungen. 17. erweiterte Auflage, bearbeitet von Helmut Kahnt. Regenstauf: Gietl 2001, ISBN 3-924861-45-5, S. 744-755.
  2. ↑ 2,0 2,1 2,2 2,3 2,4 Walter Funck: Die deutschen Notmünzen. Alle amtlichen Ausgaben und deren Varianten der Städte, Gemeinden, Kreise, Länder etc. Neu bearb. und erw. von Ralf Müller und Wolfgang Peltzer. 8. Aufl. Regenstauf: Gietl 2012, ISBN 978-3-86646-548-0, S. 616 und 662-667.
  3. ↑ Drei Zeitzeugen der deutschen Münz-Geschichte!, MDM Münzhandelsgesellschft Deutsche Münze
Di Sigg heh stamp vun „https://ksh.wikipedia.org/w/index.php?title=1-Billion-Mark-Stöck_vun_de_Provinz_Wässfale&oldid=1609729“.