Ongerscheide zwesche Versione vun dä Sigg „Bänsberch“

Inhalt gelöscht Inhalt hinzugefügt
neu
(Keine Ongerscheid)

De Version vum 17. Juli 2006 öm 22:07 Uhr

Bänsberch es e Veedel vun Berjisch Jladbach em Berjische Land.

Rodhuus un ahl Schloss en Bänsberch

Dröm eröm

Dröm eröm fingk mer Kürten, Overath, Rösrath un Kölle.

Anno dozomol

Bänsberch jitt et alld zick 1139. Se han en Urkund us dä Zigg jefunge. Un do steiht Wicherus de Benesbure als Zeuje dren. 1101 es et Berjische Land en de Besetz vun de Jrafe vun Berch jekumme. Die hatten en Bänsberch en Burch. Die wor däm Kurfürs Jan Wellem nit jod jenoch. Däm Jan Wellem sing Frau, dat Anna Maria Luisa, dät sich üvver de miserabel Heizung beklare. Deswäje hätte 1703 e neu Schloss baue losse. Dat jov Arbeid un trok vill Lück noh Bänsberch. Noch mieh Arbeid jov et dann em 19. Johrhundert em Berchbau. En neu Technik för de Verhüttung dät et müjelich maache, de Zinkblende ze notze, die se beslang nit notze kunnte. Dat jov noch ens Arbeid ze basch. Hückzedaachs kammer em Berchbau nix mieh verdeene. Et längs han se am Lüderich en dr Ääd noh Ääz jebuddelt. 1978 han se de Grube Lüderich zo jemaat.

Noh'm Zweite Weltkreech trok et die Minsche vun Kölle op et Land noh Bänsberch un en et Berjische Land. Dänne Kölsche jinge de Lück laufe. Met Enjemeindungsplän han se dann versök, die Avwanderer widder enzesammele. Nä wat jov dat ene Buhei. All hatten se eije Plän: dr Oberkreistirektor, dr Rejierungspräsident, ene janze Püngel Jodachter, de Stadt Kölle, de Stadt Berjisch Jladbach, de Stadt Bänsberch un de Inneminister. Am Engk jov et dann 1975 en Kommunale Neujliederung. Bänsberch es zickdäm e Veedel vun Berjisch Jladbach.

Verkehr

Zick 1913 jitt et en Stroßebahn vun Kölle noh Bänsberch. Am Engk vun dä Linnich han se en Bänsberch zeletz sujar e Stöckelche U-Bahn jebaut.

Bänsberch litt an de Autobahn A4.

Zom aanluure

  • Dat neue Schloss vun däm Jan Wellem es hückzedaachs e Hotel. Wä jet an de Föß hät, kann hee fürslich esse, drinke un och üvvernaachte.
  • Dat neue Rodhuus hät dä Architek Gottfried Böhm janz jescheck an dat ahle Schloss draanjebaut. Wäje däm eijesennije Turm spreche die Bänsberjer vum Aapefels.

För noh ze lese

  • Kurt Kluxen: „Geschichte von Bensberg“. Paderborn 1976
  • Willi Fritzen: „Die alte Grafen- und Herzogsresidenz Bensberg“. Bensberg 1985
  • Peter Köster: „Städte-Ehe - Die Neugliederung von Bensberg und Bergisch Gladbach 1964-1976“. Stadtarchiv Bergisch Gladbach. Beiträge zur Geschichte der Stadt Bergisch Gladbach Band 6. Bergisch Gladbach 1999. ISBN 3-9804448-3-X