Ongerscheide zwesche Versione vun dä Sigg „Klütt“

En '''Klütt''' es e schwatz dinge, wat mer en der Ovve dejd för doh ze bränne wem mer et wärrm hann well. En Klüdd es etwa hallv esu fill wi enne jevöönlijje Muurziijel wi mer se fum Boue kännd. Klütte weede heezolandt beij [[Rheinbraun|Rhingbraun]] jemaat. Do betrigg dä [[Brännschtoffhandel|Klüttemann]] sing Klütte un di schött e oddo drääht e beij uns en der Käller wäm mier de Klütte krijje. Dad es fö jevöönlisch eij mool em Jooh, un mir hoffe dat mer em Frööjooh no jädd övverisch hann, weijl em Winnte Klüüte kooufe fill düürter es wi em [[Sommer|Summer]]. Esu lang wi mer der Ovve aan hann, jeiht de Mam der Daach övver ens en de Källor un deiht do de Klütte fum jruuße Houfe en enne Klütteschtändo stivvelle, un dä weed dann do unge praat jestalldt. Dat määt se esu fill wi se läddijje hätt. Wänn dann der Pap des oovens fum Deens heijm kütt, un och di jruuße Pänz wi se fun der der Ärbeijd un fun der Schull kumme, joh do nimmp jeede esu enne Stänndo med erop su lang noch eijne doh schteijd un brängk en nävve nne Ovve. Esu ham mer emmer jenooch Klütte för ze [[Heizung|Schtoche]] doo.

Di Klütte weede wi jesaat en der [[Braunkohle|Braunkoole]] jemaat. Doh dunn riisijje Maschiine de Ääd fott baggere un do drunge es en schwarz brunge Lare, di weed och fottjebaggod un watt do fun nit jlisch no m [[RWE AG|RWE]] jeijd för [[Elektrizität|Schtroohm]] druß ze maache, dat weed zo Klütte jepräß. Di sen ußße eröm jladd un jlänze un op dä zweij anndere sigge es dat nidd esu un doo weed em Präßwerk sing [[Logo|Siejel]] Affdrogg hen jemmat. Esu wesse mir wat dat för Klütte sinn. Wischtijj es o noch dat dat Klüttemattrijaal ned naß eß. Je mieh Feuschtischkeijd en dä Klütte nämlisch dren es, öm esu schlääschter dunn se bränne un öm esu mieh dunn se kwallme. Un dat künne de Minsche jaa nit ligge, wänn ed uss em Ovve qwallmb un schtingk! Dröm dunn se och bem Klütte Präße öff nuur janz kleijne Bruch nämme fun däm wat dä Baggor livvert, weijl mer dä jood drüsch kridd un beijm Präße weet e o noch jood wärrm. Dat drieve de Feuschteschkeijd erus.