Dialekte in Nordrhein-Westfalen

Hee di Sigg_is_op Bönnsch
(Sigge op Bönnsch)
unn jeshrivve wii_mer_t_shprish
(mieh Sigge jeshrivve wii_mer_t_shprish)

De Dialekte en Noordrhing-Wessfale sen die tradetionell em Land jeschwaadte Sprooche. Se jehüre bei janz verschidde Dialekkjruppe on sen ärch ungescheedlich. Su wie ensjesammp en de noordrhing-wessfälesche Kultur sitt mer och en dä Dialekte ën relativ klor Zweideelong en ene rheinesche on ene wessfälesche Deel. De mieste Dialekte wääde bei uns em Land Platt jenannt.

Endeelong Ändere

 
De Dialekte noh dä hee benutzte Endeelong — De Övvejang zwesche Jröön on Hell entsprich mieh udde winnije dä rheinesch-wessfälesche Jrenz.

De Dialekte loßen sich en drei jruß Jruppe endeele: et Neddersächsesch (wo och dat noorddeutsch Platt beijehüürt), et Meddeldeutsch (wat sing engere Verwandtschaff mieh nohm Süde hät) on dozweschen et Nedderfränkesch (wat zimmich eng mem Hollängsch verwandt es).

En dä drei Jruppe jitt et dann Ungejruppe, wovon ävve manche nur janz am Rand vom Land vürkumme udde nur e klee Jebiet usmaache. Dat jrüüßte eenzele Platt es et Wessfälesch. Dat bedeck su e jruß Jebiet, dat me do noch net wirklich von eenem Dialekk spreche kann, sondern noch widde Ungejruppe finge moss. Dä zweitjrüüßte on wohrscheinlich bekanntste Dialekk es uns Ripoaresch Platt janz em Süd-Weste.

Em letzte Schritt deele sich die Ungejruppe dann op en de Dialekte von Städt, Dörpe udde Landstrich. Do sen die Ungescheed dann miestendeels nemmieh su jruß on me versteht sich ungereneen janz jood. Em Detail kann et natürlich och do noch Schwierichkeete jäve.

  • Münsterländesch
  • Oss-Wessfälesch
  • Sauerländesch
  • Ossfälesch (klee Jebiet öm Bad Pyrmont)
  • Noord-Neddersächsesch (klee Jebiet öm Minden)

Em Ruhrjebiet sen die al Dialekte usjestorve. Do sen em 19. on 20. Johrhondet wäje dä Koll su vill Minsche us aller Welt erövvejekumme, dat en neu Zoort von Sprooch entstanden es: et sujenannte Ruhrdeutsch. Dat es am Engk och ene Dialekk, ävve keene ursprüngliche, zigg dausend Johr jewaßene; sondern ene neue, dä op de Basis vom Huhdeutsch steht. En de Sproochwesseschaff wiërd sujet als Regiolekk bezeechnet (süch unge).

Aktwell Entwicklonge Ändere

Wie fass övveall en Deutschland jitt et en Noordrhing-Wessfale hüggzedaach ene Trend, dat emme winnije Platt on emme mieh Huhdeutsch jeschwad wiërd. Die Entwicklong verlööf ävve net övveall su flügg wie andeswo. Me kann sare, dat die meddeldeutsch Dialekte, wo uns Ripoaresch met bei es, sich besse hale könne wie die ande zwei Jruppe. Dat litt unge andrem dodraan, dat et Neddersächsesch on et Nedderfränkesch vill wigge vom Huhdeutsch ewegg sen, d. h. vill Wöörd schinge jar keen Ähnlichkeet mem Huhdeutsch ze hann. Dodurch wiërd et wohrscheinlich, dat jong Lügg komplett erövvewechsele on dä Dialekk jar nemmieh benutze, anstatt dat se beede nevvenher bruche. Bem Ripoaresch kütt sing Benutzong em Fastelovend on en de rejonale Kultur dobei, die vill stärke usjeprääch sen, wie't en Wessfale de Fall es (besondes wäje däm kultorelle Zentrum Kölle). Trotz all däm hann och die meddeldeutsch Dialekte schwähr ze kämfe on wääde emme winnije em Alldaach jesproche.

Et Huhdeutsch, wat me hüggzedaach en Noordrhing-Wessfale sprich, hät ävve natürlich sing Äjenaate. De Ungescheed zweschen ëm Rhingland on Wessfale hüürt me emme noch jood erus. Et sen ungescheedlich Regiolekte entstande, die als Ömjangssprooch op de Stroß benutz wääde, zom Beispill de Rheinesche Regiolekk em ripoaresche Jebiet. Do kütt et off vür, dat Lügg drei verschidde Sprooche schwade: op de Ärbeed fass perfektes Huhdeutsch, bem Klaf met de Metzjereifachverkäuferin e Mischmasch (Regiolekk) on des Ovends bem Jlääsje Kölsch em Stammlokal dann richtich Platt.