Billon
(mieh kölsche Sigge)
un geschrevve en de Schrievwies vun de Kölsch-Akademie
(mieh Sigge en de Schrievwies vun de Kölsch-Akademie)
Billon (vun meddellateinisch billio „Zahlgod“) is ene Legeerung us Koffer un nit mieh wie de Hälvde Edelmetall, miestens nSelver, ävver och Gold.[1] Mer kann et vum Selver an singe dunklere un e bessche fussige Färv ungerscheide, un en ene Billonlegeerung künne och noch mieh Metalle wie Zinn oder Zink drin sin. Billon woodt för dat Aanfäädige vun kleine Münze genomme,[2] ävver och vür Medallje.
De eeschte Münze us Billon woodte op de griechische Insel Lesbos em 6. un 5. Johrhundert vür Chress gemaht, ävver dat wor noch en natörliche Legeerung us Selver un Koffer. Bei de ahle Römer kom dat künsliche Billon op, öm en Selvermünze belligere Krom erenzedunn. Op die Wies kunnte de Münzhääre ööntlich Geld verdeene. Esu han se et bei ville Völker en de antike Zigg gedonn, och bei de Grieche, Römer un em Byzanz. Och em Meddelalter un bes en de neueste Zigg woodt dat noch gemaht. Dat nent mer hückzedaag Münzverschläächterung.[3]
Off däte de Gaunere de fresche Billonmünze bevür se unger dat Volk gebraht woodte, en ene Bröh us Selvernitrat un Wingstein koche, dat se verselvert wore un wie Selvermünze usgeluurt han. Noh koote Zigg wor dat Selver fott un de Münze dääte rüdliche glänze. Ene andere Beschess wor dat Ätze vun de Münze, su dat et Koffer aan de Oberfläch opgelöst wood. Ävver och die Münze wore baal als Nepp zo erkenne.
Et gov ävver noch andere Gründ vür dat Benötze vun Billon. Dat Selver wor ärg wäätvoll, un de ärmere Lück brohte klein Münze för Brud ze kaufe.Su kom et opp, klein Münze eets us Billon, un dann us Koffer ze maache.
Ene ganz andere Saach, die nix met Billon ze dunn hät, sin Bullionmünze. Dat sin moderne Münze vun reinem Gold, metzigge och Selver, Platin ov andere Krom, die für dat Aanläge oder Versteche vun ze vell Geld gedach sin. Beispill sin de Philharmoniker vun Wien us Österreich un Krügers Rand us Südafrika.
Woher mer dat wesse Ändere
- ↑ Helmut Kahnt: Billonmünze. En: Ders. (Hrsg.): Das grosse Münzlexikon. Von A bis Z. Regenstauf 2005, S. 50.
- ↑ Benedikt Zäch: Billon. En: Historisches Lexikon der Schweiz. 14. Oktober 2010, avgerofe am 21. April 2024.
- ↑ Friedrich v. Schrötter: Billon-M. In: Ders.(Hrsg.): Wörterbuch der Münzkunde, Berlin/Leipzig 1930, S. 75.