Hee di Sigg_is_op Kölsch
(mieh kölsche Sigge)
unn jeshrivve wii_mer_t_shprish
(mieh Sigge jeshrivve wii_mer_t_shprish)

Adolf van Egmont wood jeboore en Jrave en Noocht_Brabant om 12. Fäbrowa em Joohr 1438, un eß jevalle en Doornik aan de Schëllde em Hënnəjou amm 27. Juni Joohr 1477.

Wappe Adolf von Edmond

Adolf wohr enne Sonn fumm Arnold van Egmont, dämm Hächzoch van Jelldere, un de Catharina van Kleeve. En dämm Opvoljer_Shtrigg fumm Hächzochdom Jelldere hätt_e em Joohr 1465 singe Fatto jevange jesaz un wohd_dann sëlləvo do Hächzoch. Em Joohr 1468 hätt_e de Schlaach fun Straelen jääje et Hächzochdom fun Kleeve jewonne, ävver dä Hächzoch fun Bůrrjonndt, Brabant, Limbursh un Luxemburrsh un zojlish Jraaf fun Flanndere, de Artesië, Bůrrjonndt, Henegouwen, Holland, Zeeland un Namen, do Kaal dä Kühne, hädd_enn Arnold tozdämm en sing Amp zoröckjeholldt. Em Joohr 1471] wood dä Adolf ėn Hesdin funn_emm jefange jenomme. Nohr_em Kaal dem Starke singem Duud_em Joohr 1477 wood hä fon de Flamens widdo bevrëijdt. Hä jėngk ävvo norr_em sellve Joohr kapodd_em Kreesch_als_enne Aanfööhrer fun_ennem fläämėsche Heer, nohdämm de Shtaaten_em Jellderland enn jraad widdo nöü als ihre Hächzoch aanäkanndt hatte.

Sėnge Nohvoljo bleev dohderwääje do Arnold, sėnge Fato.

Dä Adolf woohr fon 1463 aff, med_enne Doochto fun dämm Hääerzoch Kaal demm Eezte fon Burbong fohiirohd_em Catharina fon Bůrbong, wat fun 1440 beß bloß 1469 jelääf hät. Dė zwëij hatte zwëij Pänz:

  • et Filippa lääfde fun 1465 beß 1547, fohiirohd ėm Joohr 1485 met_dämm Hächzoch René II fun Lothringe, dä fun 1451 beß 1508 jelääf hät, un
  • do Karrel, dä fun 1467 beß 1538 jelääf hät, dä shpääderre Hächzoch van Jelldere, fohiirohd zigk 1518 met dämm [Elisabeth funn Brunnßwigk-Lünebursh. Dat lääfde fun 1494 beß 1572, un woohr_en Doochter fum Hächzoch Hendrik VII fun Brunnßwigk-Lünebursh.